Vörumerki, gervigreind og leitarvélar

Það má segja að við séum á byrjunarreit ef við horfum til samfélagslegra áhrifa gervigreindar og er framtíðin bæði spennandi en um leið ófyrirsjáanleg. Ef við horfum til smásölu og innkaupahegðunar, þá eru ótrúlegar breytingar í sjónmáli, þ.e. hvernig fólk mun versla og hvernig fólk mun nýta sér gervigreind til að sjá um innkaupin fyrir sig, að hluta eða öllu leiti. Hér er vísað til s.k. Agent Shopping sem kann að ryðja sér til rúms hraðar en við gerum okkur grein fyrir, að minnsta kosti á framsæknum mörkuðum eins og í Bandaríkjunum. Hér sér gervigreindin um helgarinnkaupin fyrir fjölskylduna sem sparar tíma og val á vörum tekur mið af þörfum hvers og eins og á besta mögulega verðinu. Samstarf ChatGTP við Walmart, Shopify og Etsy gefur vísbendingu um hvert stefnir.

Vörumerkjavirði

Markaðssetning snýst um að auka virði vörumerkja. Þetta er langtíma verkefni sem krefst aga og að fyrirtæki hafi skýra sýn um hvers konar vörumerki þau vilja búa til (ímynd). Jafnframt þarf að hafa skilning á undirstöðuþáttum vörumerkjavirðis og hvernig hægt er að ná fram þeim þáttum sem við viljum að vörumerkið standi fyrir. Vitund og ímynd eru uppspretta vörumerkjavirðis og langtíma markmið er að fá neytendur til að versla okkar vörumerki oftar en keppinauta, meira í hvert sinn og á hærra verði. Ávinningurinn af því að skapa sterk vörumerki skilar sér með margvíslegum (og mælanlegum) hætti, meðal annars með auknum sýnileika í AI niðurstöðum og leitarvélum almennt.

Valið er neytenda

Neytendur velja gjarnan vörumerki sem þeir þekkja og treysta umfram önnur, jafnvel þó þau séu dýrari. Einhver kynslóðamunur er þó sýnilegur sem og munur á milli tekjuhópa. Í könnun meðal bandarískra neytanda kom í ljós að fólk eldra en 55 ára lagði meira traust á vörumerki sem það þekkti eða kannaðist við en 65% þeirra sagði þennan þátt skipta mestu máli þegar kom að kaupákvörðun, samanborið við 57% almennings (general population). Í sömu könnun kom fram munur á milli tekjuhópa þó hann væri ekki mikill. Þess ber þó að geta þegar við skoðum tölur af þessu tagi, þá skiptir máli hvers konar vörur og vöruflokka er um að ræða.

Góðu fréttirnar

Góðu fréttirnar eru að lögmál markaðssetningar eru í fullu gildi (sbr. uppruni og styrkur vörumerkjavirðis) en leiðirnar til að skapa og viðhalda vitund og ímynd eru flóknari með tilkomu fleiri miðla eins og samfélagsmiðla og gervigreindarmiðla á borð við Claude, Gemini og Chat GTP. Samkeppnin um athygli neytenda er mikil og auglýsendur verða að vanda sig þegar kemur að auglýsingabirtingum (hverjir hafa tækifæri til að sjá þær) og inntaki auglýsinga (eru skilaboðin til þess að skapa eftirtekt og í samræmi við ímynd vörumerkis).

Vörumerki verða að vera viðeigandi, skara framúr og uppfylla þarfir (og væntingar) neytenda - ef þau gera það ekki, þá verða þau einfaldlega síður fyrir valinu. Það sama á við þegar kemur að sýnileika í AI en sterk vörumerki sem uppfylla þarfir neytenda fá meira rými í samþættum leitarniðurstöðum og meðmælum AI. Ávinningur aukins sýnileika er tíðari sala, í meira magni og á hærra verði.

Hvernig gerum við þá?

Markaðssetning snýst um að auka virði vörumerkja, það er ekki að breytast. Vörumerki þurfa að að uppfylla þarfir neytenda og gera það með merkingarbærum hætti: þau þurfa að vekja sterk, jákvæð og einstök hugrenningatengsl sem aðgreina þau frá öðrum vörumerkjum í sínum vöruflokki. Sýnileiki í leitarvélum og samþættum niðurstöðum AI skiptir miklu máli eins og sýnileiki í leitarvélum hefur alltaf gert.

Það sem virðist vera að breytast er að AI umbunar vörumerkjum sem hafa sterk tengsl við neytendur og þeir treysta. Fyrirtæki sem hafa hugað að langtíma uppbyggingu vörumerkja og hafa sinnt leitarvélabestun til langs tíma hafa forskot á keppinautana og munu njóta þess í sýnileika og arðsemi til lengri tíma.