Ivar Gestsson ráðgjafi, Birtingahúsið

Ívar Gestsson hefur verið ráðinn aðstoðarframkvæmdastjóri Birtingahússins. Hann útskrifaðist með BS-próf í viðskiptafræði og MS-gráðu í viðskiptafræði og fjármálum frá Háskóla Íslands. Ívar hefur undanfarin ár gegnt starfi birtingastjóra og unnið við birtinga- og markaðsráðgjöf fyrir mörg af þekktustu og verðmætustu vörumerkjum landsins, bæði innlend og erlend. Þeirra á meðal Volkswagen, H&M, ELKOTM og Saffran

"Þetta er því mjög ánægjulegt og verðskuldað skref sem ég veit að allir okkar samstarfsaðilar munu fagna. Auk ráðgjafavinnunnar mun hann nú koma með beinum hætti að öllum helstu stjórnunarlegum ákvörðunum og um leið leggja sitt að mörkum að Birtingahúsið verði áfram leiðandi á sínu sviði," segir Hugi Sævarsson, framkvæmdastjóri. "Það eru skemmtilegir og fróðlegir tímar framundan á auglýsingamarkaðinum, sama hvar litið er. Örar og spennandi tækninýjungar, breyttar vinnuaðferðir og kvik flóra af miðlum," bætir hann við. 

,,Ég er þakklátur og spenntur að fá að taka af enn meiri ábyrgð þátt í áframhaldandi uppbyggingu og sókn með okkar viðskiptavinum og samstarfsaðilum," er haft eftir Ívari Gestssyni.

Birtingahúsið var stofnað árið 2000 og veitir faglega og óháða ráðgjöf um auglýsingabirtingar, markaðssetningu og uppbyggingu auglýsingaherferða. Félagið er í alþjóðlegu samstarfi við Dentsu Aegis Network, sem hefur yfir að ráða einu allra stærsta og öflugasta neti markaðs- og birtingaráðgjafar í heiminum, með starfsemi í yfir 140 mörkuðum. Meðal dótturfélaga DAN eru Carat, Vizeum og iProspect. Birtingahúsið hefur undanfarin níu ár verið útnefnt Framúrskarandi fyrirtæki samkvæmt greiningu CreditInfo.